الثلاثاء، 30 سبتمبر 2008

قصيدة نهاية المشوار

يا من فرضت على كلمات الحق في أفواهنا
ألفاً وألفَ حصار
وطعنت شمس العدل في بلادنا
فكان عهدك البغيض ليلا
ليس فيه نهار
وبقيت جاثما على أنفاسنا
مكروها.. تحميك منا آلاف من الأسوار
فاحذر صمت شعب صابر
اذ يثور يداس أمثالك تحت أقدامه
شعب إذ يثور يكون كالأعصار
أتريد أن تأتي بنسلك ليكملوا مسيرة
الإفساد والانحلال والعهر والخيانة والدمار
قل لخلفك المشؤوم يراجع عقله
أم أنه قد خلق كي يكون حمار
يا أحمقا لا تستطع أن ترث شعبا
أبناؤه أحرار
* *
إفعل ما تشاء .. عدل قوانينك الحمقاء
واطفئ كل نبراس يضئ بالأنوار
اقتل الأحلام في عيون شبابنا
فيفرون من خيراتك المزعومة
غرقا .. في عرض البحار
وصخور الجبال قد سقطت على رعاياك
يا جالب الكوارث يا عميل العار
اعقد في مؤتمراتك فلم يعد أحد يصدقها
اتسمي الهدم يا كاذبا إعمار
انا سئمنا حتى ذكراك فارحل
إلى مزبلة التاريخ ذاك نهاية المشوار

الأحد، 28 سبتمبر 2008

فعلا أزهى العصور

بعد الحكم بحبس الصحفي إبراهيم عيسى رئيس تحرير الدستور شهرين لأنه فقط تجرأ على ( الذات الرئاسية ) وقال انه مريض يتضح فعلا مدى وجودنا في أزهى عصور المهلبية أو الخيبة القوية !!فعلا عيسى غلطان .. لأنه مغرقش أكتر من ألف مصري في عبارته كان زمانه خد براءة ولا كان محافظ وفي عهده تقع الصخور على رؤوس أبناء محافظته ولا يتمكن من توفير اي شقق لهم بل يسيب عليهم الكلاب البوليسية كان زمانه فضل محافظ برده .. ولا عيسى نائب في المجلس لهف حبة فلوس وطفش كان زمانه قاعد في لندن دلوقتي سلطان زمانه .. ولا هو رئيس وزراء طويل محتاس في أزمة تواجه سواء كانت عبارة او دويقة او حريق مجلس الشورى او حتى حريق المسرح القومي كان زمانه فضل برضه رئيس وزراء ولا حتى وزير نقل القطارات تدخل في بعضها وتولع في عهده وهو زي ما هو قارفنه باعلاناته منتجاته يقولك شيفروليه الدبابة !!ولا عيسى رئيس جمهو ........... لاااااااااااااااااااااااا والنبي بلاش ليطلع مجرد التخيل ده تهمة ولا حاجة الراجل لسه واخد شهرين !!لكن ببساطة عيسى راجل شريف هي دي مصر( خير الكلام ما قل ودل )

الأحد، 21 سبتمبر 2008

أغنية شباب 6 أبريل

كلمة وقالها شباب الجيل
إحنــــــا شباب 6 إبريـل
كلمة قوية
الحرية
هنرددها جيل ورا جيل
إحنــا شباب 6 إبريل
* * *
مهما الضلمة تغطي النور
مهما يحاولوا يعلو السور
بكرة الحق أكيد منصور
في شروق طالع بعد الليل
كلمة وقالها شباب الجيل
* * *
مصر بلدنا وهنحميها
م اللي ناهبها من حراميها
مهما يحاولوا يعملوا فيها
احنا شباب زنفسنا طويل
كلمة وقالها شباب الجيل
* * *
اصحى يا مصري وقوم من نومك
يوم الثورة هو يومك
ساكت ليه وطنك بيلومك
يالا حاسب كل عميل
كلمة وقالها شباب الجيل
احنا شباب 6 إبريل

الجمعة، 19 سبتمبر 2008

أول تدوينة يا جدعان !!

الحمد لله دخلنا عالم المدونات وبقينا بلوجيرز قد الدنيا ، المشكلة اللي واجهتني أكتب ايه في أول تدوينة ليا .. تصدقوا يا جماعة كانت مشكلة عويصة للغاية .. مش المشكلة أكتب إيه يعني مش قلة كلام لا سمح الله ولا حاجة بس المشكلة هي إن المصايب اللي في البلد دي أكتر بكتير من إني أختار بالساهل . . زمانك بتقول إيه المدونة النكد دي لااااااااا أوعى تفتكر اني نكدي خالص أنا فريش جدا يعني هاحكيلك مثلا حدوتة حصلت معايا أنا شخصيا :
كان فيه اعتصام أهالي الدويقة اللي وقعت بيوتهم وراحوا المخيمات فالأمن بتاعنا ( ربنا يحميه مش عايزين مشاكل احنا لسه بنتدي ) المهم الأمن تقريبا عرف ان فيه اطفال صغيرة فحب يلاعبهم فسيب عليهم الكلاب البوليسيه وقالهم سيبوا المخيم بالعربي كدا ( انت ملكش شقق عندي )

الأهالي خدوا بعضهم وطلعوا على محافظة القاهرة واعتصموا هناك . . واحنا كشباب سياسيين كنا بنروح نبات معاهم يعني ربما يحتاجوا حاجة ولا محتاجة أخوكم بقى كان موجود يوم الطامة الكبرى


اليوم ده كان غريب جدا . . رحت الصبح بدري لقيت زمايلي صاحيين ومفرفشين والاهالي عمالين يسألونا نعمل ايه وتفتكروا هناخد حقنا واحنا نطمنهم لحد ما جه واحد كدا قالوا عليه ( نائب المحافظ ) أول مرة اعرف ان فيه ( نائب محافظ ) طب مش لما يبقى فيه ( نائب رئيس الجمهورية ) ما علينا متودناش في داهية المهم جه الأخ نائب المحافظ ده وقال عايز يتكلم مع الأهالي في ناس راحت تسمعه وناس مرديتش قامت قوات الأمن منزلة بلطجية لابسين مدني قال ايه عايزين كل الأهالي يسمعوا اسم النبي حارسه وصاينه نائب البيه المحافظ !!

المهم كان عايز يخليهم يفضوا الاعتصام مقابل وعود زائفة . . الاهالي هاجوا وماجوا ورفضوا انهم يفضوا الاعتصام هبا ولقينا الدونيا اتقلبت يا ولدي . . بلطجية بيدخلوا وواحد كدا طوله اربع ادوار بيكلم العبد لله اللي هو قمة السلوعة والأنيميا اللي في الدنيا وبصوت أجش فشر فريد شوقي قالي انت مين بلعت ريقي وقلت في سري هو يوم منيل من أوله ما علينا المهم أنا صحفي ( لا صحفي ولا حاجة بيني وبينكوا ) بنفس الصوت : " فين كارنيهك " قلتله ماعييش ومش هاوريك لما لقاني كدا واثق من نفسي صوته خف شويه وندهلي عميد قالي بص بقى صحفي مش صحفي مافيش تصوير وخليك بعيد عشان هايحصل حاجات مش ظريفة !!

المهم اتصلت بأحد شباب 6 أبريل قلتله الأمن هايفض الاعتصام خلال دقائق وقد كان . . الجرجرة اشتغلت أطفال ينضربوا بالشلاليت واحدة حامل ضربوها ست كبيرة مشلولة على كرسي متحرك برضه مايضرش كله بينضرب ويتجرجر !!
قعدت انسحب شويه شويه وتمكنت من تهريب بعض الأهالي وطلعنا على نقابة الصحفيين عملنا وقفتنا الاحتجاجية

ملحوظة المدونة اسمها ( مصري حر ) بزمتكوا مش انا نصاب حرية ايه في البلد دي